विद्रोहका लागि आव्हान

Baral 3 - Copyऋषिराज बराल
‘मे दिवश’ का सन्दर्भमा ‘विसर्जनवादीहरूसित सम्बन्ध विच्छेदको घोषणा’ शीर्षकको वक्तव्यसहित मैले बैद्य समूहसित सम्बन्ध विच्छेद गरेको थिएँ । यसका सन्दर्भमा बैद्य समूहसित गाँसिएका झारपात पतिंगरहरूले भ्रम सिर्जना गर्न थालेका हुनाले थप प्रस्ट पार्नु आवश्यक ठानेको छु ।
मोहन बैद्य ‘किरण’ को नेतृत्वमा रहेको नेकपा- माओवादीको गत सातौं महाधिवेशेनदेखि नै खास गरेर कार्यदिशाका सम्बन्धमा मेरो फरक मत रहेको कुरा पार्टीमै दर्ज भएको कुरा थियो र विप्लवजीहरूले नयाँ पार्टी गठन गरेपछि भएको बानेश्वर भेलामा पनि यसलाई प्रस्ट पारिएको थियो । एकपछि अर्को गरेर पार्टी अकर्मण्यता फसेको र गद्दार घोषणा गरेको प्रचण्डहरूसित अनेक परिपंच मिलाएर एकता गर्ने करिवकरिब अन्तिम तयारी भएपछि आफूले असहमति जनाएको थिएँ । खासगरेर कार्यदिशा तथा ”पार्टी एकता” का सम्बन्धमा बहसछलफल गर्ने भन्दा हुकुमी डण्डा चलाउने प्रवृत्ति देखिएपछि केही साथीहरुसितको छलफलपछि मैले बैद्य समूह परित्याग गर्ने निर्णय गरेको थिएँ l गत बैशाख १४ गते पत्रकार सम्मेलन गरेर यसलाई सार्वजनिक गर्ने निर्णय गरी सबै तयारी गरेको भए पनि १२ गतेको महाविनाशकारी भूकम्पका कारण यस कार्यक्रमलाई स्थगित गर्नु आवश्यक ठानी मे दिवश पारेर वक्तव्य मात्र सार्वजनिक गरिएको थियो ।
सत्य के हो भने नेकपा-माओवादीको नेतृत्वपंक्ति कुण्ठा र हीनत्वभावले ग्रस्त छ र क्रान्तिकारी हुनुको देखावटी आडम्बरमा बाँचेको छ । अन्तर्राष्ट्रिय कम्युनिस्ट आन्दोलनमा यसको भूमिका विवादास्पद भैरहेको अवस्थामा, भारतीय माओवादीलाई आतंककारी भनेर सोनिया गान्धीलाई चिठी लेख्ने प्रचण्डलाई क्रान्तिकारी भन्दै पार्टी एकताका लागि संयुक्त हस्ताक्षर गरेपछि र यसका केही सदस्यको मोदी सरकारप्रतिको बढ्दो मोह प्रदर्शित भएपछि भारतीय माओवादी मात्र नभएर रिम निर्माणमा लागेका अन्य माओवादीहरू पनि बैद्य समूहप्रति आशंकित भएका छन् l क्रान्तिका कुरा त पुस्तकमा पनि छन्, मूल कुरा व्यबहारमा जानेकी नजाने भन्ने हो l वास्तवमा हिजो प्रचण्ड समूह छोड्दा उठाएका १८ बुँदामद्ध्ये सबैजसो बुँदा बैद्य समूहमा लागु हुन्छ l राहतका नाममा विदेशीहरूबाट दादागिरी प्रकट भैरहेको र सरकारले सबै ठीक छ भनेजसरी केही नबोलिरहेको तथा सरकारका तर्फबाट राहतमा व्यापक अनियमितता भएको भनेर चारैतिरबाट आवाज उठिरहेको समयमा ”राहतमा सरकारलाई सघाउने” भनेर जसरी बैद्य समूहबाट धारणा बाहिर आयो, यसबाट पनि बैद्य समूहको वैचारिक टाटपल्टाइ प्रस्ट हुन्छ l त्यसैले म के कुरामा दृढ छु भने वैद्य समूह वैचारिक तथा सांगठनिक दृष्टिले विसर्जनको स्थितिमा पुगेको छ र केही लोभी-पापीहरू, केही भ्रष्टाचारीहरू र बुढ्यौली लागेर समय काट्ने चौतारी बनाउनेहरूबाहेक माओवादी आन्दोलनको झण्डाको रक्षाका लागि केही गर्नुपर्छ भन्नेहरूले ढिलो-चाँडो बैद्य समूह परित्याग गर्नेछन् । कतिपय जिल्लाका जिम्मेवार कमरेडहरू सम्पर्कमा आउनुभएको र विद्रोही समूह बनाएर जाने कुरामा छलफल चलिरहेको यथार्थ प्रस्ट पार्दै, भूकम्प पीडाको कारण यसले हाल ठोस रुप लिन नसके पनि हाम्रो प्रयास त्यसतर्फ जारिरहेको कुरा पनि म यहाँ प्रस्ट पर्न चाहन्छु l
क्रान्तिको कुरा गर्ने, तर यसका लागि व्यवहारमा जान अलिकति पनि तत्परता नदेखाउने किरण समूहका सामु वैचारिक तथा साङ्गठनिक विसर्जन अथवा प्रचण्डसामु आत्मसमर्पणबाहेक अर्को विकल्प छैन । यस्तो सङ्गठनसित टाँसिइरहनु भनेको सारतः आफूले आफैँलाई ध्वस्त पार्नु मात्र हो । आफू मार्क्सवाद–लेनिनवाद–माओवाद र नयाँ जनवादी क्रान्तिप्रति प्रतिबद्ध भएर बौद्धिक–सांस्कृतिक क्षेत्रमा सक्रिय रहने र राष्ट्रिय स्वाधीनता र नयाँ जनवादी क्रान्तिका लागि वर्गसङ्घर्षको बाटोमा दृढताका साथ अघि बढेका शक्तिहरूप्रति कलम र विचारको माध्यमबाट सहयोग र समर्थन निरन्तर रहने कुरा पनि म यहाँ प्रस्ट पार्न चाहन्छु ।
विप्लव समूह नेपाली क्रान्तिप्रति गम्भीर छ भने यसले पनि कार्यदिशामा रहेको अमूर्तता तथा कतिपय सन्दर्भमा व्यवहारमा देखिएको अन्योलतालाई सच्याउँदै क्रान्तिकारीहरूलाई व्यापक रूपमा गोलबन्द गर्ने नीति, योजना र कार्यक्रम अघि सार्नुपर्छ l राष्ट्रिय स्वाधीनता तथा जातीय पहिचानका सन्दर्भमा विप्लव समूहको बुझाइ तथा अडान सही छ l यसका साथै बैद्य समूहभित्र तल्लो तहमा थुप्रै इमान्दार र क्रान्तिकारी कार्यकर्ताहरू छन् भन्ने कुरालाई गम्भीरतापूर्वक लिनु आवश्यक छ र सही अर्थका क्रान्तिकारीहरू, सबै थरी योग्यता र क्षमताहरू एउतै झण्डामुनि कसरी गोलबद्ध हुने भन्ने कुरामा हामी सबैको चिता र चिन्तन केन्द्रित हुनु पनि आवश्यक छ l क्रान्तिकारीहरूको नयाँ किसिमको गोलबद्धता आजको आवश्यकता हो l
मार्क्सवाद-लेनिनवाद- माओवाद नेपाली क्रान्तिका मार्गनिर्देश सिद्धान्त हुन्, नयाँ जनवादी क्रान्ति हाम्रो न्यूंनतम कार्यक्रम हो र क्रान्तिका तीन जादुगरी हतियारको कुशलतापूर्वक प्रयोगबाट नै यो लक्ष्य हासिल गर्न सकिन्छ भन्ने कुरामा हामी सबै दृढ र विस्वस्त हुनैपर्छ l यही नै माओवादी झण्डाको रक्षाको बाटो हो l त्यसैले ‘विद्रोह गर्नु न्यायोचित छ’ भन्ने मार्क्सवादी मूल्यलाई आत्मसात गर्दै बैद्य समूहमा रहेका क्रान्तिकारी साथीहरूलाई अब त्यहाँ बसेर केही हुन्छ भन्ने भ्रमबाट मुक्त हुन र नयाँ किसिमले गोलबद्ध हुने अभियानमा सामेल पनि म हार्दिक आह्वान गर्दछु l
०००

You can leave a response, or trackback from your own site.

Leave a Reply

See real websites hosted and built by iPage customers.